A Tropa do Rueiro estrea en Tabeaio a súa nova comedia 'Pen Pal'
O grupo de teatro afeccionado A Tropa do Rueiro, unha das formacións culturais máis consolidadas de Carral, regresará este sábado aos escenarios locais coa estrea da súa nova produción titulada 'Pen Pal', unha comedia coa que agardan, unha vez máis, facer rir e desfrutar ao público.
A representación terá lugar o sábado 13 de decembro ás 20.30 horas no Local Xente Nova de Tabeaio, nunha cita cultural que contará con entrada de balde ata completar aforo. Desde a Concellería de Cultura de Carral destacan o compromiso do grupo coa dinamización cultural do municipio, así como a súa traxectoria de anos ofrecendo teatro accesible e pensado para todas as idades.
'A Tropa do Rueiro' caracterízase polo seu humor directo e pola posta en escena de historias próximas, polo que se agarda unha grande acollida entre os veciños e veciñas nunha das últimas propostas culturais do ano no municipio.