A tradición ecuestre e a festa daranse a man no xantar popular de Cambás
Cambás volverá converterse o próximo 18 de abril nun punto de encontro para os amantes da tradición cabalar e do ambiente festivo cunha nova edición do Xantar Popular con Ruta Cabalar, unha xornada que combinará actividade ecuestre, gastronomía e música ao longo de todo o día.
A programación arrancará ás 10.00 horas no Toxiño cun almorzo gratuíto para as persoas asistentes. Media hora máis tarde, ás 10.30 horas, está prevista a saída da ruta cabalar, unha das propostas centrais dunha convocatoria que busca reunir á veciñanza e aos participantes arredor dunha cita xa consolidada no calendario local.
Tras o percorrido, a actividade continuará ás 13.30 horas coa sesión vermú, que se desenvolverá na volta da ruta e contará coa animación musical de Dúo Delux e coa colaboración de Bar Porto. A organización destaca tamén que esta parte da xornada se celebrará en carpa climatizada.
O prato forte chegará ás 15.00 horas co xantar popular, no que o menú estará composto por paella mixta, churrasco, crioulos, viño, gaseosa, auga, pan, sobremesa, café e licores. O prezo será de 33 euros por persoa, mentres que a entrada será gratuíta para os menores de 8 anos e terá un custo de 15 euros para as crianzas de entre 8 e 12 anos.
A festa continuará durante a tarde con sorteos, música e pinchos gratuítos de liscos e chourizos a cargo de Bar Porto. Xa pola noite, ás 23.00 horas, a celebración pecharase cunha verbena na que volverá actuar Dúo Delux.
O evento está organizado pola Comisión de Festas Cambás 2026 coa colaboración de Cabaleiros de Cambás. As reservas para a comida e para a ruta poderán realizarse ata o 10 de abril a través de calquera dos teléfonos que figuran no cartel.