A Torre de Hércules abrirá O Gran Camiño cunha contrarreloxo que alterará a mobilidade en boa parte da cidade
A Coruña converterase este martes 14 de abril no punto de saída de O Gran Camiño 2026, unha das citas ciclistas máis destacadas do calendario internacional, que comezará cunha contrarreloxo individual con saída e meta na Torre de Hércules.
A primeira etapa disputarase integramente na cidade, cun percorrido pola contorna do paseo marítimo que situará a Coruña no foco da atención deportiva e mediática ao longo de toda a xornada. A celebración da proba levará consigo un dispositivo especial por parte do Concello, con afeccións ao tráfico rodado, ao estacionamento e ao transporte público en distintos puntos do municipio.
Os cortes de tráfico comezarán a partir das 11.00 horas e afectarán especialmente ao paseo marítimo e ás vías da súa contorna. O Concello recomenda evitar o uso do vehículo privado nas zonas máis sensibles e planificar os desprazamentos con antelación, sobre todo nos barrios de Monte Alto, Riazor, Labañou, Os Rosais e O Portiño.
Co obxectivo de facilitar a mobilidade, a información sobre a proba foi organizada en tres sectores, Torre de Hércules-Riazor, Escravas-Labañou e Os Rosais-O Portiño. A cidadanía poderá consultar mapas interactivos con detalles sobre os cortes, os desvíos e os itinerarios alternativos previstos durante a xornada.
O operativo tamén terá incidencia no transporte público. As liñas de autobús urbano 3, 3A, 7, 11, 12 e 14 veranse afectadas, con anulación de paradas nas zonas incluídas no percorrido. No caso das liñas 12 e 14, habilitarase unha parada provisional na rúa Manuel Azaña. Tamén haberá limitacións no servizo de taxi e quedarán fóra de servizo as estacións de BiciCoruña situadas dentro do circuíto.
O dispositivo de seguridade contará coa participación da Policía Local, Protección Civil e os servizos municipais, co propósito de garantir o desenvolvemento da proba e compatibilizala coa actividade diaria da cidade. O acceso para os servizos de emerxencia estará garantido en todo momento. Desde o Concello apelan á colaboración da veciñanza e piden seguir as indicacións do persoal autorizado durante a celebración do evento.