A tenda de Solidariedade Internacional de A Coruña celebra o seu 20 aniversario
Solidariedade Internacional de Galicia celebra este venres 28 de novembro de 2025, ás 19.00 horas, o 20 aniversario da súa Tenda de Comercio Xusto na Coruña. O acto terá lugar no seu espazo actual, situado na rúa San Andrés número 25, local 9, onde a organización promove a economía solidaria e o consumo responsable.
A tenda abriu por primeira vez en 2005 na rúa Orzán. Desde entón pasou por dúas mudanzas, incluíndo unha etapa na rúa Alcalde Canuto Berea, ata consolidarse na súa ubicación actual no centro da cidade. Ao longo destas dúas décadas logrou manterse en pé fronte a crises económicas, o declive do pequeno comercio e diversos desafíos sociais, sen renunciar ao seu compromiso cos dereitos humanos e a protección do planeta.
Nestes vinte anos, un total de 57 persoas colaboraron de forma activa na tenda, xa fose como voluntarias ou como parte do cadro de persoal técnico. Grazas ao seu traballo, comercializáronse produtos de alimentación e artesanía de comercio xusto por un valor próximo ao medio millón de euros, contribuíndo a mellorar as condicións de vida de milleiros de produtores e produtoras de América Latina, África e Asia.
Desde a organización subliñan que estes vinte anos non serían posibles sen as persoas consumidoras responsables que, pouco a pouco, foron conformando unha clientela fiel e comprometida. Son elas as que fan viábel que a tenda siga abrindo cada día e que o comercio xusto continúe gañando presenza no tecido comercial da cidade.
‘Esta tenda é moito máis que un punto de venda: é un espazo de activismo, encontro e cidadanía comprometida. Se chegamos ata aquí é grazas á fidelidade e ao apoio da nosa clientela, que forma parte esencial desta historia’, destacan desde Solidariedade Internacional de Galicia, convidando a participar no encontro deste venres para celebrar unha traxectoria construída de maneira colectiva.