A situación de Protección Civil de Culleredo abre debate tras o lume do Monte Costa
Na madrugada deste luns rexistrouse un incendio forestal no Monte Costa, en Culleredo, que mobilizou a brigadas contraincendios da Xunta de Galicia, a Policía Local, os bombeiros do parque provincial de Arteixo, o servizo municipal de emerxencias, así como efectivos de Oleiros e persoal municipal de augas. A coordinación do operativo realizouse desde Cillobre, onde tamén estivo presente o alcalde, José Ramón Rioboo. As autoridades informaron de que o lume non chegou a afectar vivendas, aínda que por precaución se cortou o subministro eléctrico na zona.
Este episodio produciuse no mesmo momento en que a Agrupación de Voluntarios de Protección Civil de Culleredo anunciou a suspensión da súa actividade por falta de medios. A decisión, segundo trasladaron, débese á ausencia de recursos básicos como seguros en vigor ou liñas de comunicación operativas co 112.
O BNG local relacionou esta situación cunha “degradación continuada” tanto de Protección Civil como do Servizo Municipal de Emerxencias, sinalando que Culleredo depende con frecuencia da axuda dos concellos limítrofes en caso de emerxencia. A formación atribúe esta situación á “falta de xestión” da Alcaldía.
Desde o goberno municipal lembran que os servizos de emerxencias municipais estiveron presentes no operativo do Monte Costa e que a coordinación cos equipos da Xunta, da Deputación e doutros concellos permitiu conter o lume sen danos persoais nin materiais de relevancia.