A SDC Ordes proclámase campioa do VIII Trofeo Cidade Deportiva Vista Alegre
A Cidade Deportiva Vista Alegre acolleu unha tarde de fútbol inesquecible, na que a veciñanza e os afeccionados puideron gozar dun torneo cargado de emoción, valores e espírito de convivencia.
A SDC Ordes impúxose con autoridade e proclamouse campioa do VIII Trofeo tras vencer con claridade nos seus encontros. No primeiro partido superou á SD Santa Cruz de Montaos por 3-0, con goles de Mou, Brais e Diego. Posteriormente, volveu repetir marcador fronte ao Vila de Ordes, grazas aos tantos de Suso, Pastur e Dopico.
A competición completouse co duelo entre a SD Santa Cruz de Montaos e o Vila de Ordes, que se resolveu cun 3-0 a favor dos primeiros, con goles de Borja e un dobrete de Torti.
Máis alá dos resultados, a cita serviu para poñer en valor a unión entre os clubes da contorna, o respecto no xogo e a paixón polo deporte, converténdose nunha auténtica festa para o fútbol ordense.