A San Silvestre Coruña 2025 abre as inscricións para a carreira popular de fin de ano
A San Silvestre Coruña confirma a súa carreira popular urbana de fin de ano e abre o proceso de inscricións. Desde este mércores ás 10.00 horas, as persoas afeccionadas e atletas federados poden reservar dorsal para a última gran cita pedestre do calendario. O prazo manterase aberto ata as 23.59 do 22 de decembro ou ata esgotar prazas.
A organización ofrece prezo reducido ata o 10 de decembro na web oficial. As altas tamén poden realizarse en liña a través de www.championchipnorte.com. Quen prefira a vía presencial poderá inscribirse no Corte Inglés, do 17 de novembro ao 21 de decembro, condicionado á dispoñibilidade de dorsais.
O evento, de marcado carácter deportivo, festivo e familiar, inclúe varias modalidades: probas infantís, andaina, Marcha Nórdica e CanSilvestre, ademais da proba absoluta. O cupo dispoñible é de 5.500 dorsais para a carreira principal, 300 para as categorías infantís, 100 para Marcha Nórdica e 100 para a CanSilvestre.
A carreira disputarase o mércores, 31 de decembro, en horario de tarde. As saídas infantís serán ás 16.00, 16.15, 16.30 e 16.45; a proba absoluta partirá ás 17.00, co seguinte ordenamento: Cajón A (menos de 31:00), Cajón B (31:00 ou máis) e, a continuación, CanSilvestre, Andaina e Marcha Nórdica.