A reurbanización da rúa San Andrés avanza ata á rúa Alameda
A reurbanización de San Andrés deu un novo paso coa apertura ao tránsito peonil do tramo que conecta Torreiro coa rúa Alameda. Esta actuación, impulsada polo Goberno municipal de Inés Rey, busca revitalizar o comercio local durante a campaña de Nadal, coincidindo coa instalación de iluminación festiva na rúa.
Os traballos realizados inclúen a recuperación da configuración histórica da rúa como bulevar do século XVIII, con plataforma única, ampliación de beirarrúas, plantación de moreiras de Valdeorras e instalación de novo mobiliario urbano. Ata o momento, xa está aberta a meirande parte do bulevar, desde Torreiro ata a praza de Santa Catalina, ampliándose agora ata a Alameda.
Nas próximas semanas, as obras continuarán no treito que vai desde Alameda ata a praza de Pontevedra, así como na rúa de Santa Catalina, onde restan pequenos traballos de xardinaría e axustes finais. A data estimada para a finalización completa do proxecto é o mes de febreiro, pese a que o prazo inicial era marzo, grazas ao bo ritmo da execución.
Unha vez rematada a reurbanización, San Andrés contará cun carril de circulación en cada sentido, permitindo tamén o restablecemento dos percorridos das liñas de autobús afectadas. O orzamento da intervención supera os tres millóns de euros.