A Reserva de Biosfera Mariñas Coruñesas presenta a súa primeira Guía de Excelencia Ecoturística
A Reserva de Biosfera Mariñas Coruñesas deu a coñecer hoxe en Abegondo a súa primeira Guía de Excelencia Ecoturística, un documento pioneiro que compila boas prácticas e información esencial para o desenvolvemento dun turismo sostible e respectuoso co medio ambiente. Esta iniciativa busca consolidar o territorio como referente no ecoturismo e recoñecer o traballo de todos os actores implicados.
O acto contou coa participación de José Antonio Santiso, presidente da Reserva; Belén do Campo, delegada da Xunta de Galicia; Xosé Regueira, vicepresidente da Deputación da Coruña; Diego López, xestor da entidade; e Luis Galán, ilustrador local, quen colaborou no deseño da publicación en coordinación co sector turístico. Tamén asistiron representantes de empresas certificadas do territorio, como Enflor Agro ou 77 Turismo Betanzos.
A guía segue a estela da xa consolidada Guía de Excelencia Agroalimentaria, publicada anteriormente, e é o resultado dun ano de traballo coordinado co sector turístico local. Este proxecto contou co apoio da Deputación da Coruña e da Axencia de Turismo de Galicia, consolidando así un modelo que combina o respecto pola natureza coa promoción do patrimonio cultural e etnográfico.
O obxectivo principal do documento é proporcionar unha ferramenta de consulta tanto para visitantes coma para profesionais, resaltando os valores ambientais e culturais que fan único a este territorio, recoñecido pola UNESCO como Reserva de Biosfera. Os contidos inclúen información sobre biodiversidade, paisaxes, gastronomía e etnografía, así como experiencias ecoturísticas innovadoras.
Durante a súa intervención, José Antonio Santiso destacou o esforzo colectivo para levar a cabo este proxecto. “Esta guía non sería posible sen o apoio dos actores locais, institucións e todas as persoas que traballan no día a día para que o ecoturismo en Mariñas Coruñesas sexa un exemplo de sustentabilidade”, afirmou.
Diego López, xestor da Reserva de Biosfera, incidiu na importancia de promover un turismo de proximidade e de loitar contra a estacionalidade. “Presentamos esta guía en xaneiro porque queremos demostrar que Mariñas Coruñesas é un destino atractivo durante todo o ano, non só na tempada alta”, explicou. López describiu o documento como “unha ferramenta útil e práctica tanto para cidadáns como para profesionais do sector”.
Xosé Regueira, vicepresidente da Deputación, eloxiou a capacidade da Reserva para xestionar proxectos con gran impacto tanto a nivel local como provincial. “Mariñas Coruñesas é un exemplo de territorio que sabe aproveitar os seus recursos e posicionarse como un referente turístico en Galicia”, apuntou.
Pola súa banda, Belén do Campo resaltou a importancia de involucrar a todos os municipios no desenvolvemento sostible. “Cada un dos 17 municipios ten un papel crucial nesta guía, que pon en valor as súas iniciativas locais e o compromiso das persoas que apostan por un turismo responsable e innovador”, concluíu.
A presentación rematou cunha proxección de imaxes do territorio e un recoñecemento ás empresas locais que cumpren os criterios de sustentabilidade, destacando a súa contribución ao éxito da iniciativa.