A Reserva de Biosfera Mariñas Coruñesas impulsa o emprendemento feminino no rural
A sede da Reserva de Biosfera Mariñas Coruñesas en Abegondo acolleu a celebración da xornada Emprendemento Feminino na Reserva de Biosfera Mariñas Coruñesas, un encontro que puxo en valor o papel da muller como motor de dinamización económica nos ámbitos rurais e destacou o potencial do territorio como espazo de oportunidades empresariais sostibles.
A iniciativa foi promovida pola Federación de Mulleres e Familias do Ámbito Rural (Amfar) en colaboración coa propia Reserva, e contou coa presenza de representantes institucionais como o presidente da entidade, José Antonio Santiso; a conselleira do Medio Rural, María José Gómez; e a directora xeral de Promoción da Igualdade, María Quintiana. Tamén participou a presidenta de Amfar, Catalina Rodríguez, ademais de varias emprendedoras que compartiron os seus proxectos vinculados ao territorio.
Durante a súa intervención, Santiso salientou a capacidade da marca de calidade Mariñas Coruñesas para xerar novas iniciativas de desenvolvemento económico, facendo fincapé nos 12 anos de traxectoria da Reserva como referente en sostibilidade. “Temos un territorio cun enorme potencial para o emprendemento. Animamos a todas as mulleres con ideas a aproveitar esta contorna onde se aposta polo coidado do patrimonio e a innovación sostible”, declarou.
Pola súa banda, a conselleira do Medio Rural expuxo as medidas postas en marcha pola Xunta de Galicia para favorecer a incorporación da muller ao sector primario, como a prioridade nas axudas á incorporación de titulares e cotitulares de explotacións agrarias, os plans de mellora ou o apoio ao desenvolvemento de pequenas explotacións. Gómez destacou tamén o programa Leader como ferramenta útil para impulsar proxectos emprendedores fóra do ámbito estritamente agrícola.
A xornada incluíu relatorios sobre a nova Política Agraria Común 2023-2027 e rematou cunha visita á granxa Queixos Cajiao, en Paderne, exemplo de produción local integrada na marca da Reserva.
Participaron emprendedoras como as responsables de Floradeira (Paderne), Un mar de cores (Arteixo), Sara Sal Cerámica (Betanzos), Piazza (Cambre) e Horta A Moura (Bergondo), que amosaron as súas experiencias e retos á hora de emprender desde o rural con perspectiva de xénero e sostibilidade.