A Rede Provincial de Coworking da Deputación da Coruña mantén un verán cheo de actividades e innovación
Durante este verán, os 11 espazos que forman parte da Rede Provincial de Coworking da Deputación da Coruña manteñen unha actividade intensa para fomentar o emprendemento e dinamizar a economía local.
En Oleiros, o coworking do Pazo de Arenaza foi o escenario do evento Tecendo Redes, organizado pola empresa Permae Ser. Esta iniciativa profesional centrouse en fortalecer a colaboración entre empresas ao redor da sostibilidade, a transición enerxética e a economía circular, aspectos claves para o desenvolvemento empresarial da comarca.
Pola súa banda, a Casa do Pescador, en Miño, continúa sendo un punto de referencia para as persoas emprendedoras da zona, ofrecendo espazos de traballo e apoio para o impulso de proxectos con impacto directo na economía e comunidade local.
Estes dous espazos, xunto cos outros nove da Rede Provincial, preparan a súa participación na segunda edición do Rede Coworking Fest, que se celebrará do 15 ao 21 de setembro. Durante esa semana, organizaranse numerosas actividades formativas, charlas e obradoiros destinados a fortalecer as redes de contacto e fomentar o emprendemento na provincia da Coruña.