Deputación

Artistas, empresas e compañías poderán inscribir os seus espectáculos ata o 6 de febreiro, con opcións de financiamento de entre o 30 e o 75 % segundo o tamaño do municipio

A Rede Cultural da Deputación da Coruña contará en 2025 cun orzamento de 1.975.000 euros. O prazo de inscrición para artistas, empresas e compañías estará aberto desde o 17 de xaneiro ata o 6 de febreiro. A Deputación financiará entre o 30 e o 75 % dos custos dos espectáculos, en función do número de habitantes de cada concello.

Os concellos interesados deberán solicitar as actuacións entre o 18 de marzo e o 1 de abril. A resolución comunicarase antes do 22 de abril no caso dos municipios e antes do 22 de maio no das entidades sen ánimo de lucro. As actividades realizaranse ao longo de 2025 e ata o 31 de marzo de 2026.

Nesta edición, o catálogo da Rede Cultural manterá os catro programas habituais:

• ‘¡Escena ao Vivo!’: espectáculos profesionais de teatro, monicreques, maxia, danza e música.
• ‘Visións’: contidos audiovisuais e cinema.
• ‘Lingua a Escena!’: propostas profesionais con contidos específicos para a dinamización da lingua galega.
• ‘Alicerce’: espectáculos de grupos non profesionais de música, danza e teatro, abertos tamén a entidades culturais sen ánimo de lucro.

A deputada de Cultura, Natividade González, destacou que a iniciativa garante “unha oferta diversificada e de calidade” en toda a provincia, promovendo actividades culturais atractivas para os veciños e apoiando o sector cultural galego. González subliñou que en 2024 a Rede programou 1182 espectáculos en 91 localidades, contribuíndo non só ao disfrute da cidadanía senón tamén ao traballo dos profesionais do sector.

As bases da convocatoria están dispoñibles no Boletín Oficial da Provincia do 16 de xaneiro.