A Rampla do Matadoiro na Coruña estrea nova imaxe tras realizarse a reurbanización
A veciñanza da contorna da Rampla do Matadoiro xa pode desfrutar dun espazo renovado e máis accesible. A alcaldesa da Coruña, Inés Rey, visitou a zona para supervisar o resultado das obras de reurbanización, que se atopan xa practicamente rematadas. A intervención, financiada con fondos europeos Next Generation, supuxo un investimento superior ao medio millón de euros e permitiu mellorar notablemente a mobilidade peonil, crear novas zonas verdes e humanizar este enclave próximo ao Paseo Marítimo.
Acompañada pola concelleira de Infraestruturas e Mobilidade, Noemí Díaz, a rexedora destacou que “desde o Goberno municipal continuamos creando espazos de calidade nos nosos barrios grazas ás diferentes convocatorias de fondos europeos ás que nos presentamos e que nos permiten mellorar a calidade de vida da cidadanía”. Ademais, lembrou que A Coruña foi a primeira cidade de España en investimento por habitante na segunda convocatoria dos fondos Next Generation.
A remodelación centrouse no tramo comprendido entre a rúa da Rampla do Matadoiro, dende o Paseo Marítimo, ata o paso peonil na confluencia coa rúa Adelaida Muro. A actuación abrangueu máis de 1.700 metros cadrados, nos que se implantou unha plataforma única para ampliar beirarrúas e zonas peonís, gañar en accesibilidade e reforzar a seguridade viaria. Neste sentido, reconfiguráronse os pasos de peóns existentes, elevando o cruzamento con Adelaida Muro. Está previsto que a vindeira semana se complete a instalación dunha varanda que incrementará aínda máis a seguridade.
Tamén se acondicionou a vía de acceso e saída ao aparcadoiro do hotel Meliá María Pita, e acometeuse a renovación da rede de saneamento e do sistema de iluminación pública. A intervención completouse coa plantación de novo arboredo, a creación de áreas verdes e a instalación de mobiliario urbano, contribuíndo a unha transformación sostible e amable deste espazo urbano.