A RAG entrega os premios Contádenos o voso Día de Luísa Villalta a tres colexios de Sada, Cangas e A Coruña
A Real Academia Galega (RAG) celebrou este martes a entrega dos premios do concurso escolar Contádenos o voso Día das Letras de Luísa Villalta na Casa da Cultura de Sada. O evento recoñeceu o traballo realizado polo CEIP da Espiñeira-Aldán (Cangas), o Colexio Fogar Santa Margarida (A Coruña) e o CEIP Sada y sus Contornos, destacando a labor do profesorado na defensa e promoción da lingua galega nun contexto no que as enquisas amosan unha perda de uso entre as novas xeracións.
O concurso, que forma parte do proxecto Primavera das Letras (iniciado pola RAG en 2016 co apoio da Deputación da Coruña), busca achegar a cultura galega aos máis novos. Fina Casalderrey, coordinadora da iniciativa, foi a encargada de conducir o acto, que contou coa presenza de familiares de Luísa Villalta, como a súa nai María Gómez e a súa irmá Susana Villalta, así como do alcalde de Sada, Benito Portela, antigo alumno da escritora. Ademais, estiveron presentes representantes do profesorado do IES Isaac Díaz Pardo, onde Villalta exerceu como docente durante máis dunha década, e estudantes do CEIP Sada y sus Contornos, participantes nas actividades galardoadas.
Casalderrey destacou a importancia deste proxecto para a RAG: “A Primavera das Letras sodes vós, os nenos e nenas que, da man das familias e do profesorado, descubrides a nosa lingua e cultura”. Tamén louvou aos docentes, “vocacionais que defenden o galego mesmo en tempos difíciles, como facía Luísa Villalta”.
Os estudantes do CEIP Sada y sus Contornos falaron en nome da súa comunidade educativa, recoñecendo que o premio foi entregado “por facer o que debemos, poñendo todo o noso empeño na celebración do Día das Letras Galegas”. O director do colexio, Andrés Saavedra, salientou que o galego “une, comparte e axuda a entendernos como pobo, sendo parte esencial da nosa identidade”.
Propostas educativas e artísticas
O CEIP da Espiñeira-Aldán participou con actividades como unha versión da canción Terra de Tanxugueiras, titulada Fálame en galego, e obradoiros inspirados na faceta musical de Luísa Villalta. Pola súa parte, o Colexio Fogar Santa Margarida desenvolveu actividades como a Xincana Luísa Villalta e a creación dun vídeo documental titulado A Coruña de Luísa Villalta, coa colaboración de varios centros educativos.
O acto finalizou cunha interpretación colectiva da canción Lingua guapa, cuxa letra, composta por Fina Casalderrey, reflicte o amor pola lingua galega e forma parte do proxecto Primavera das Letras.