A profesora oleirense Fina Paulos logra un primeiro premio estatal por unha experiencia para mellorar a competencia dixital do alumnado
A docente oleirense Fina Paulos Lareo, profesora no IES Maximino Romero de Lema (Baio-Zas), vén de acadar o primeiro premio nos ‘I Premios Nacionais a Experiencias Educativas que fomentan a Competencia Dixital do Alumnado 2025’, convocados polo Ministerio de Educación, Formación Profesional e Deportes.
O recoñecemento chega pola experiencia titulada ‘Miño en xogo’, presentada en equipo xunto con Óscar Manuel Rey Calo e distinguida como primeiro premio na modalidade B (docentes en equipo) dentro da categoría de Educación Secundaria, segundo o listado oficial publicado polo INTEF (Instituto Nacional de Tecnoloxías Educativas e de Formación do Profesorado).
Estes premios naceron co obxectivo de poñer en valor prácticas docentes que integren tecnoloxías dixitais na aula e contribúan ao desenvolvemento da competencia dixital do alumnado, ademais de servir como modelo para que outros centros poidan adaptar e replicar as propostas. Na súa primeira edición, o programa premiou 27 experiencias e recoñeceu a 37 docentes e 6 centros educativos.
Segundo información publicada sobre o proxecto, a proposta premiada tamén se materializou como un recurso educativo aberto (REA), cun traballo de análise e adaptación pedagóxica para facelo reutilizable e aplicable noutros contextos educativos.
Desde o Concello de Oleiros trasladaron publicamente os parabéns polo galardón, subliñando o valor dun recoñecemento estatal que sitúa o traballo docente realizado en Galicia entre as experiencias educativas máis destacadas do ano no eido da competencia dixital.