Sucesos

O evento, a cargo da ETRAD Zanfona Ensemble, terá lugar o sábado 14 de decembro ás 20:00 horas e dará comezo a unha ampla programación de actividades para todos os públicos

O Concello de Oleiros dará comezo á súa programación de Nadal o próximo sábado 14 de decembro ás 20:00 horas cun concerto moi especial: “25 Zanfonas”. A actuación, que terá lugar na Praza Esther Pita, estará a cargo da ETRAD Zanfona Ensemble, un grupo de músicos da Escola Municipal de Vigo de Música Folk e Tradicional (ETRADVIGO), dirixidos polo mestre titular de zanfona Anxo Pintos. Durante o espectáculo, os artistas interpretarán un repertorio que combina a tradición galega vocal e instrumental con outras influencias folclóricas internacionais, sempre coa zanfona como protagonista e símbolo vivo da nosa cultura.

Este concerto marca o inicio dunha ampla programación de Nadal en Oleiros, que incluirá actividades destinadas a todos os públicos. Obradoiros infantís, animación, pasarrúas e espectáculos musicais serán algúns dos eventos destacados que terán lugar na Praza Esther Pita ata principios de xaneiro.

Programación destacada:

• Luns 23 de decembro (17:00-20:00): Obradoiros artísticos de Nadal para nenos e nenas (árbores, adornos e postais).
• Xoves 26 de decembro (17:30-19:30): Animación infantil con xogos e música.
• Sábado 28 de decembro (19:00): Concerto Ves como sabes?, espectáculo musical para todos os públicos.
• Sábado 4 de xaneiro (18:30-20:00): Pasarrúas de Nadal coa banda DixieKings, homenaxeando o jazz tradicional de New Orleans.

Con esta proposta, Oleiros aposta por un Nadal cheo de tradición, música e actividades para toda a familia, consolidando a Praza Esther Pita como un espazo central na celebración destas festas.