A patronal do autobús acepta a mediación no AGA, pero mantense a folga na provincia da Coruña
A patronal do transporte en autobús comunicou que acepta a mediación solicitada polas centrais sindicais no marco do AGA (o sistema galego de solución extraxudicial de conflitos laborais). A través do Consello Galego de Relacións Laborais quedou fixada unha primeira xuntanza para o luns 26 de xaneiro, tras semanas de conflito polo convenio provincial do sector.
A CIG interpreta o paso da patronal como unha reacción á presión das mobilizacións e ao seguimento dos paros, pero advirte de que a folga convocada para este venres 23 segue adiante, coa chamada a secundar tamén as concentracións previstas. Este venres será, ademais, outra xornada de paro no transporte en bus da provincia da Coruña (urbano, interurbano, escolar e discrecional), con excepción do bus urbano da cidade da Coruña, que conta con convenio propio.
No plano da negociación, o sindicato reclama un acordo que permita pechar o conflito e evitar unha escalada cara a unha folga indefinida, que as centrais levan semanas poñendo sobre a mesa se non hai avances. Os representantes sindicais lembran que o persoal denuncia soldos conxelados desde 2024 e condicións laborais sen actualizar desde hai anos, e critican tamén a falta de implicación da Xunta na resolución do conflito.
As mobilizacións deste venres 23 están convocadas na provincia en tres puntos: na Coruña, diante da Dirección Xeral de Mobilidade (xunto á estación de autobuses); en Santiago, manifestación con saída nas cocheiras de Monbús en Amio e remate no mesmo punto; e en Ferrol, diante do edificio da Xunta.