A patinaxe artística toma Monte Alto cunha fase de niveis que reúne 260 deportistas esta fin de semana na Coruña
O pavillón de Monte Alto acolle esta fin de semana, os días 21 e 22 de febreiro, a I Fase de Niveis de Patinaxe Artística (Coruña Norte), unha cita de carácter formativo que reunirá arredor de 260 patinadores e patinadoras de 14 clubs da provincia. A competición está organizada polo Concello da Coruña en colaboración coa Federación Galega de Patinaxe.
As probas desenvolveranse en tres xornadas diferenciadas. O sábado haberá sesión de mañá, de 10.00 a 14.30 horas, e sesión de tarde, de 16.30 a 21.30 horas. O domingo a actividade retomarase pola mañá, de 10.00 a 14.30 horas.
Trátase dun evento centrado no deporte base, concibido para impulsar a práctica da patinaxe artística desde as primeiras etapas e favorecer o crecemento técnico das e dos participantes. A organización subliña tamén o valor educativo deste tipo de competicións, nas que se reforzan hábitos como o esforzo, a disciplina e o compañeirismo.
O concelleiro de Deportes, Manuel Vázquez, puxo o foco na relevancia destas citas para o tecido deportivo local e provincial. 'O deporte base é unha prioridade para este Concello. Probas como esta permiten que centos de rapazas e rapaces teñan a oportunidade de competir, medrar e gañar experiencia nun contorno organizado e seguro, fortalecendo ademais o tecido deportivo da nosa cidade', sinalou.
A celebración desta fase na Coruña encaixa na liña municipal de apoio ao deporte formativo e á promoción de hábitos de vida saudables, unha das áreas que o Goberno local identifica como estratéxicas nas súas políticas deportivas.