A Orquestra Sinfónica de Galicia únese a Great Straits para homenaxear a Dire Straits
Este sábado 21 de xuño, coincidindo coa celebración do Día da Música, o Palacio da Ópera da Coruña converterase no escenario dun espectáculo sen precedentes: Great Straits: Dire Straits Symphonic. A partir das 20.00 horas, a banda tributo Great Straits e a Orquestra Sinfónica de Galicia (OSG) ofrecerán un concerto conxunto no que revisarán os grandes éxitos de Dire Straits cun enfoque sinfónico e innovador a nivel mundial.
“Desde o Goberno de Inés Rey buscamos que a cidadanía goce de espectáculos únicos no mundo como este, que xunta a unha das mellores bandas tributo a Dire Straits coa alta calidade da nosa OSG”, afirmou o concelleiro de Cultura e Turismo, Gonzalo Castro. Trátase dunha proposta inédita que mestura a enerxía do rock coa excelencia da interpretación clásica, cun repertorio que repasará os temas máis emblemáticos da histórica banda liderada por Mark Knopfler.
Esta será tamén unha actuación destacada para a OSG, xa que será a súa primeira colaboración cunha formación de rock. A orquestra xa ten traballado anteriormente con artistas do ámbito pop, como Xoel López, ou da música tradicional galega, como Luar na Lubre, pero nunca antes dera o salto ao universo do rock.
As últimas entradas para o concerto están dispoñibles a través da plataforma Ataquilla, así como nas billeteiras da praza de Ourense e do propio Palacio da Ópera. Todo apunta a que será unha noite inesquecible para os amantes da música, que poderán escoitar clásicos como Sultans of Swing, Brothers in Arms ou Money for Nothing cunha nova dimensión sonora.