A ópera 'L'elisir d'amore' volve á Coruña cun elenco de estrelas xunto á Orquestra Sinfónica de Galicia
A Coruña acollerá os días 27 e 29 de setembro unha nova representación a ópera 'L'elisir d'amore', de Gaetano Donizetti, no marco da súa Tempada Lírica. O Teatro Colón será o escenario desta ópera cómica, que contará cun elenco de luxo encabezado polo tenor mexicano Ramón Vargas e a soprano aragonesa Ruth Iniesta, acompañados por Damián del Castillo e o barítono galego Luis Cansino.
Ramón Vargas regresa á Coruña tras nove anos para dar vida a Nemorino, mentres que Ruth Iniesta interpretará a Adina, logo de ser recoñecida como mellor cantante de lírica en 2024 pola Academia de las Artes Escénicas. Xunto a eles, completarán o elenco Damián del Castillo no papel do sargento Belcore e Luis Cansino como o Dr. Dulcamara, un vendedor de elixires máxicos.
A Orquestra Sinfónica de Galicia, baixo a batuta de Guillermo García Calvo, será a encargada de interpretar a partitura de Donizetti, mentres que o Coro Gaos, dirixido por Fernando Briones, tamén formará parte do espectáculo.
O evento contará cunha posta en escena colorida, inspirada na obra de Botero, e unha produción de Nausica Opera International. Para os amantes da música, o xoves 26 de setembro, terá lugar unha conferencia en Afundación a cargo de Julián Jesús Pérez, onde se analizará a obra de Donizetti. As últimas entradas están dispoñibles en taquilla e online.