A ONG Educo demanda aos candidatos á Xunta medidas de axuda ás infancias vulnerables
Con motivo das vindeiras eleccións galegas do 18 de febreiro, a ONG de infancia Educo pide aos partidos políticos e ao próximo goberno que salga dos comicios un maior compromiso coa infancia. "Temos unha nova oportunidade para que a infancia estea no centro das decisións políticas. O máis urxente é que se concreten accións para mellorar a vida dos máis vulnerables e evitar que ninguén quede atrás", afirma Mónica Viqueira, delegada de Educo en Galicia. Así mesmo, lembra que, no territorio galego, 1 de cada 4 menores de 18 anos (24,9%) viven en risco de pobreza ou exclusión; é dicir, 93.000 nenos, nenas e adolescentes.
Entre as peticións da asociación aos partidos políticos destacan as seguintes:
Axudas para os comedores escolares
Unha das preocupacións da ONG é o acceso ao comedor escolar. Pois en Galicia, o 49% do alumnado de primaria asiste ao comedor da escola segundo datos do informe Comedor escolar universal e gratuíto: un obxectivo alcanzable e urxente de Educo. Con todo, quedan fóra nenos e nenas en situación de pobreza e vulnerabilidade. Nunha enquisa desenvolvida tamén por Educo revelou que o principal motivo que teñen as familias para non levar aos nenos e nenas ao comedor é o económico.
"No comedor das escolas non só garántese a alimentación. É un espazo no que seguen aprendendo hábitos nutricionais e de saúde, no que se relacionan de maneira distinta cos seus compañeiros e compañeiras, xestionan os conflitos de maneira positiva ou deciden que queren facer no seu tempo", explica Viqueira.
Ademais, a responsable afirma que non soamente influiría niso, xa que ir ao comedor reduciría o absentismo escolar: "Sabemos que se os nenos e nenas van comer a casa e están sós porque a súa familia está a traballar ou buscando emprego, é máis probable que non volvan a clase pola tarde. Por todo iso, debería ser universal e gratuíto para toda a infancia. Somos conscientes de que este obxectivo é difícil de conseguir a curto prazo. Con todo, si que cremos que Galicia conta cun orzamento suficiente como para asegurar o acceso ao comedor de maneira gratuíta a todos os nenos e nenas en risco de pobreza e exclusión”. Dende Educo, tamén, recalcan a importancia de unificar o sistema de axudas ao comedor entre aquelas cuxa xestión depende da administración autonómica e aquelas que dependen dos municipios.
Erradicar a violencia sobre a infancia
Outro dato que preocupa a Educo é o da violencia que sofre a infancia. Acabar con esta secuela é traballo de todos e todas, o que implica un compromiso real con esta loita, empezando por parte das administracións. A sensibilización e a formación son claves para atallar esta problemática, polo que defenden que é preciso que todos os profesionais que están en contacto coa infancia reciban formación para poder traballar na súa prevención e detección precoz.
Así mesmo, e xa no ámbito escolar, reclaman unha mellor implantación da figura do coordinador de benestar e protección nas escolas galegas. Iso significa máis recursos, máis formación, máis tempo e máis apoio para que poidan desenvolver o seu traballo”, afirma a delegada de Educo en Galicia.
Máis prazas gratuítas en Educación Infantil
En canto ao primeiro ciclo de educación infantil, a ONG pide máis prazas gratuítas e que se teña en conta o criterio de renda para o acceso. “Somos a Comunidade Autónoma coa taxa de escolarización máis alta de España de 0 a 2 anos, o 56%. Iso conseguiuse grazas a que as familias non tiñan que pagar por escolarizar aos seus fillos e fillas. Iso demóstranos o interese que teñen de que os nenos e nenas vaian á escola en idades temperás, algo que se demostrou beneficioso para a súa futura formación. Con todo, ata que non haxa prazas gratuítas para todo o mundo que as necesite, non conseguiremos que esta primeira etapa educativa sexa realmente equitativa”, asegura Viqueira.
Aumentar os orzamentos destinados á cooperación internacional
Por último, Educo quere tamén poñer o foco na cooperacióninternacional. A pandemia e as crises concatenadas xeraron unha onda global de desemprego, vulnerabilidades sociais e económicas adicionais que afectan sobre todo a quen xa se atopa en situacións de risco. Para isto, a cooperación descentralizada é moi importante, por iso solicitan garantir o crecemento anual dos orzamentos destinados á cooperación internacional da Xunta de Galicia segundo o recollido no V Plan Director da Cooperación Galega, aplicando un 3% destes a actividades para a educación para a cidadanía global e un 10% a aumentar a inversión en educación en emerxencias.