A nova pista municipal de tenis abrirase á veciñanza cunha tarde de exhibición e participación
Carral inaugurará este sábado 11 de abril a súa nova pista municipal de tenis cunha xornada pensada para achegar este deporte á veciñanza dun xeito aberto e participativo. A actividade desenvolverase pola tarde e servirá non só para estrear oficialmente a instalación, senón tamén para convidar ao público a coñecer de preto o seu funcionamento.
A cita contará coa colaboración do Club Escola de Tenis Marineda, que se encargará de dinamizar a sesión cun programa no que se combinarán exhibicións e propostas prácticas dirixidas a persoas de diferentes idades. O obxectivo é converter a apertura da pista nun primeiro contacto co tenis para quen queira achegarse a este deporte.
A xornada comezará ás 17.00 horas cunha breve presentación e cunha demostración inicial protagonizada por xogadores e xogadoras en idade xuvenil, que realizarán exercicios de quecemento físico e específico de tenis. A continuación, haberá unha sesión práctica centrada nos golpes de fondo e de rede, nesta ocasión a cargo dos equipos cadetes do club.
O programa incluirá tamén un exercicio dedicado ao saque e rematará cunha simulación de xogo real, con puntos nos que se reproducirán situacións de partido con saque e resto. A actividade pecharase cunha foto de grupo na que participarán tanto os deportistas como as persoas asistentes.
Desde a organización explícase que a xornada nace cun claro espírito participativo, polo que o público poderá incorporarse aos xogos e exercicios previstos en función da asistencia e da disposición de cada persoa. No caso de que haxa menos participación, a tarde manterá o seu atractivo cun formato máis centrado na exhibición deportiva.