A Noite Branca 2025 arrinca nos Xardíns de Méndez Núñez coa aposta polo comercio local
A alcaldesa da Coruña, Inés Rey, deu o pistoletazo de saída a unha nova edición da Noite Branca, un evento xa consolidado como referente no calendario cultural e comercial da cidade. A inauguración tivo lugar nos Xardíns de Méndez Núñez e contou coa presenza de representantes institucionais, empresariais e sociais. A iniciativa está promovida pola Asociación Zona Comercial Obelisco co obxectivo de revitalizar o comercio local e dar vida ás rúas coruñesas.
Durante a súa intervención, a rexedora subliñou o valor simbólico e funcional dos Cantóns e da contorna do Obelisco, afirmando que representan o “corazón simbólico e funcional da cidade” e engadindo que “a súa conexión coa rúa Santo André conforma un sendeiro urbano de identidade, tradición e modernidade que estamos a recuperar coa súa humanización: máis espazo peonil, mellor accesibilidade e mobilidade máis sostible”.
A programación da Noite Branca 2025 abrangue todo o día con propostas culturais, gastronómicas e comerciais, e conta coa participación de máis dun cento de establecementos que se suman á festa con actuacións e promocións especiais. A alcaldesa destacou este evento como exemplo da “cultura de vivir” que define A Coruña e apelou a seguir utilizando o espazo público como ferramenta para dinamizar a economía e reforzar o tecido comercial.
Ao acto asistiron tamén a concelleira de Emprego, Comercio e Mercados, Diana Cabanas; a presidenta da Asociación West Galicia, Carmen Blach; o presidente da Federación Galega de Comercio, Miguel Agromayor; e Pedro López en representación de Estrella Galicia. Rey tivo palabras de recoñecemento para a nova presidenta da Asociación Zona Comercial Obelisco, Carolina Carrillo, así como para as entidades colaboradoras e para a xerente da entidade, Rosa Mena.
Especialmente emotiva foi a mención á Asociación West Galicia, que traballa coas familias afectadas por enfermidades raras e epilepsia. A alcaldesa quixo poñer en valor a súa implicación na cidade e o labor que desenvolven na visibilización de necesidades sociais e sanitarias concretas. “A Noite Branca tamén é un espazo para lembrar que a cidade é de todas e todos, e que a inclusión e o apoio ás persoas con necesidades específicas debe estar presente en cada iniciativa cidadá”, concluíu.