A Mostra de Teatro Escolar da Coruña celebra a súa 34ª edición con 25 grupos participantes
O Concello da Coruña impulsa un ano máis a Mostra de Teatro Escolar, que este curso acadou a súa trixésimo cuarta edición. O evento desenvolverase entre o luns 7 de abril e o martes 13 de maio en distintos centros educativos da cidade, reunindo un total de 25 grupos teatrais de 16 colexios e institutos. A mostra distribuirase en tres categorías educativas: educación infantil (2 grupos), educación primaria (17 grupos) e educación secundaria e bacharelato (6 grupos).
A Mostra enmárcase nas políticas educativas e culturais promovidas polo Goberno de Inés Rey, que aposta por unha educación pública de calidade e por iniciativas que fomenten a creatividade e o desenvolvemento integral do alumnado. Esta edición consolida unha liña de traballo que entende a cultura como unha ferramenta clave para a aprendizaxe e a convivencia.
As representacións terán lugar tanto en horario de mañá como de tarde, permitindo que o alumnado comparta experiencias e coñecementos escénicos coa comunidade educativa. Todas as actuacións serán gravadas e valoradas por un xurado composto polos recoñecidos actores e directores teatrais Ramiro Neira e José Leis, ademais de Ana Judel, técnica municipal de Educación. O xurado manterá os mesmos criterios de valoración que en anteriores edicións, tendo en conta aspectos como a orixinalidade ou adaptación do texto representado: a dramatización da obra; a corrección e fluidez na expresión; o vestiario e maquillaxe ou a escenografía e iluminación
O Concello da Coruña recoñecerá o esforzo dos participantes cun cheque de 100 euros para os grupos gañadores de cada categoría. O concelleiro de Educación, Juan Ignacio Borrego, destacou a importancia deste evento: “Cada grupo representa o entusiasmo, o traballo en equipo e o talento das nosas aulas. O teatro é unha ferramenta pedagóxica extraordinaria que contribúye á formación emocional, social e comunicativa do alumnado”.
A gala de entrega de premios celebrarase o venres 6 de xuño, ás 17.00 horas, no Fórum Metropolitano. Durante o acto, representaránse as obras dos grupos gañadores de cada categoría, convertendo o evento nunha gran celebración da creatividade, do talento e do traballo colaborativo do alumnado coruñés.
Nesta edición participan 16 centros educativos da cidade: a Escola Infantil Municipal Luis Seoane, o CEIP Concepción Arenal, o CEIP Sal Lence, o CEIP Rosalía de Castro, o CEIP San Francisco Javier, o CEIP Víctor López Seoane, o CEIP Cidade Vella, o CEIP María Pita, o CEIP Ramón Otero Pedrayo, o CEIP Raquel Camacho, o CEIP Emilia Pardo Bazán, o IES Rafael Dieste, o IES Agra do Orzán, o IES Adormideras, o Colexio Santo Domingo e o Colexio Esclavas. Estes centros conforman un total de 25 grupos teatrais repartidos entre os diferentes niveis de ensino, reflexo do compromiso da comunidade educativa coruñesa coa creatividade, a expresión artística e a convivencia escolar.