A mocidade poderá formarse como monitor de tempo libre con clases en Santa Cruz
O Concello de Oleiros vén de convocar un curso para obter o título de monitor de tempo libre que se impartirá na Casa da Mocidade Portaberta, en Santa Cruz. A formación está pensada para mozas e mozos de entre 18 e 30 anos, con preferencia para persoas empadroadas no municipio, e esixe ter cumpridos os 18 anos e contar coa ESO.
A programación desenvolverase os sábados de abril, maio e xuño, ata o 27 de xuño, e incluirá tamén catro xornadas en domingo. O horario previsto é de 9.00 a 14.00 horas e de 15.00 a 20.00 horas, cun total de 10 horas lectivas por día. En conxunto, serán 200 horas de formación, repartidas en 150 presenciais e 50 en modalidade en liña.
As inscricións poderán presentarse desde o luns 2 de marzo ás 10.00 horas ata o 20 de marzo ás 10.00 horas, a través do formulario habilitado na web municipal. Se a demanda supera as prazas ofertadas, o Concello realizará un sorteo público no edificio da Fábrica o luns 23 ás 11.00 horas. Para ampliar información, remiten ás Casas da Mocidade Portaberta e As Pedras.