Eventos

A Reserva da Biosfera entregou en Biocultura os diplomas ás firmas que superaron o proceso de formación e avaliación e xa suma máis de cen entidades certificadas

A marca de calidade da Reserva de Biosfera Mariñas Coruñesas continúa medrando coa incorporación de once novas empresas turísticas do territorio, que recibiron os seus diplomas tras superar o proceso de formación e avaliación esixido pola entidade. O acto celebrouse no marco da feira Biocultura e contou coa participación do presidente da Reserva, José Antonio Santiso, e do vicepresidente da Deputación da Coruña, Xosé Regueira.

As firmas distinguidas pertencen a varios municipios do territorio e son Área Pernocta Punta do Petón e Un Mar de Cores, en Arteixo; Hotel e Restaurante Bemar do Camiño, en Paderne; Casa Grande do Soxal e Mel das miñas colmenas, en Oza-Cesuras; Casa Rural Horta de Arriba, en Sobrado; El galeón de la ría, en Sada; Noa Boutique Hotel, en Oleiros; e Paadín Eventos, Terra Food Solutions e Viveiro A Revolta, en Cambre.

A través deste plan, Mariñas Coruñesas facilita ás empresas turísticas dos seus 17 concellos a obtención dunha tripla certificación, ao sumar o selo da propia Reserva aos distintivos SICTED e Club de Ecoturismo de España. Segundo destacou Santiso, formar parte desta marca supón apostar pola sostibilidade, a mellora continua e un modelo turístico vencellado á conservación do medio, ao desenvolvemento local e á cohesión territorial. Coa nova entrega, a certificación das Mariñas Coruñesas supera xa as cen empresas entre produtores, restaurantes, aloxamentos, guías turísticos e firmas de servizos.