A igrexa de San Xosé acolle unha misa cantada e un concerto de música sacra
A música sacra será a protagonista este domingo en Meicende cun encontro que pretende combinar tradición, recollimento e harmonía. A igrexa de San Xosé, situada na Travesía de Meirás, acollerá unha misa cantada seguida dun concerto especial a partir das 13.00 h.
No programa figura a participación de dúas formacións con ampla traxectoria no ámbito coral: o Coro Aires de Bergantiños e a Coral Polifónica Lembranzas de Santa Cruz, que achegarán un repertorio pensado para a liturxia e para o desfrute do público.
A actividade está organizada polo Club Norte Arte A Coruña e conta co apoio da Deputación, da Fundación Emalcsa e de EIPS. Desde o Concello de Arteixo destacan este evento como unha proposta cultural que busca emocionar a través da música e dinamizar a vida social da parroquia.