A Fundación Luis Seoane trae á Coruña unha viaxe única ao Xapón do século XIX
Do 29 de maio ao 7 de setembro, a Fundación Luis Seoane converterase nunha xanela aberta ao antigo Xapón coa exposición 'Arte e guerra. Geishas e samuráis no antigo Xapón', un proxecto comisariado por Ferrán López Alargada, presidente da Federación Española de Anticuarios. A mostra, promovida polo Concello da Coruña, reúne máis dun cento de obras pertencentes a unha das coleccións privadas de arte xaponesa máis importantes do Estado.
A exposición ofrece un percorrido completo pola vida, a estética e a organización social do Xapón do século XIX, a través de gravados ukiyo-e, fotografías de época, armaduras, kimonos tradicionais, obxectos persoais e incluso unha sección dedicada á famosa estampa da Gran Onda de Kanagawa de Hokusai. A mostra estrutúrase en seis seccións temáticas: Teatro, Geisha, Shunga (as imaxes da primavera), Netsuke e Kakemono, Cultura de guerra e Samuráis.
O apartado dedicado ao teatro recolle escenas do Nō, a forma máis clásica e aristocrática, e do kabuki, expresión máis popular e colorida nacida da cultura urbana do período Edo. Pola súa parte, a sección das geishas afonda na súa figura como artistas refinadas, expertas na danza, na música e na conversa, afastando tópicos e mostrando obxectos de uso cotián como peites, espellos ou perrucas que axudan a entender mellor o seu papel na sociedade.
Un dos espazos máis singulares da mostra é o dedicado ao shunga, gravados de temática erótica que ofrecen unha visión do erotismo xaponés moi diferente á europea, onde predominan a sutileza, o simbolismo e mesmo o humor. Tamén destacan os netsuke, pequenas tallas de madeira ou marfil que servían como contrapeso para colgar obxectos do obi ou cinto dos kimonos, así como os kakemono, rolos verticais decorativos en papel ou seda.
Outro dos eixos centrais da exposición é a cultura de guerra e a figura do samurái, cuxas armaduras orixinais poderán verse na mostra. Estes guerreiros combinaban a súa habilidade no combate coa lealdade e o código de honra, e a evolución das súas armas e defensas reflicte tamén a transformación da sociedade xaponesa ata a chegada das armas de fogo e a modernidade.
A exposición complétase cun apartado dedicado á fotografía antiga, onde se mostra o labor de autores como Felice Beato, considerado un dos pais da fotografía no Xapón, que contribuíu a documentar a desaparición dun mundo tradicional en pleno proceso de cambio.
O concelleiro Gonzalo Castro destacou que exposicións coma esta axudan a ampliar a nosa mirada e conectan A Coruña co mundo a través da cultura, e puxo en valor a aposta do Goberno local por encher de contido de calidade espazos culturais de referencia como a Fundación Luis Seoane.
A entrada á mostra será gratuíta, e está previsto que se realicen actividades paralelas como visitas guiadas, obradoiros didácticos e encontros divulgativos arredor da cultura xaponesa, co obxectivo de facer desta proposta unha experiencia completa e accesible para todos os públicos.