A Fundación Luís Seoane acolle as primeiras Xornadas sobre deseño de produtos alimentarios
A cidade de A Coruña converteuse no punto de encontro do deseño galego grazas á celebración das primeiras Xornadas sobre deseño de produtos alimentarios baixo o título ‘Do deseño tamén se come e se bebe’. Esta iniciativa, organizada pola área de cultura da Deputación provincial dentro do marco do Premio Luís Seoane de Deseño, busca poñer en valor o papel do deseño como unha ferramenta fundamental para o desenvolvemento do sector agroalimentario galego.
A deputada de cultura, Natividade González, encargouse de inaugurar o evento xunto co comisario do certame, Pepe Barro. González destacou que “desde a área de cultura da Deputación, este ano demos un paso histórico: por primeira vez puxemos en marcha un premio específico de deseño, o Premio Luís Seoane de Deseño, que fallamos recentemente, e as actividades complementarias organizadas ao redor deste certame como esta que hoxe celebramos”. A deputada subliñou que o deseño vai máis aló dunha disciplina creativa, e que é “unha ferramenta esencial para o desenvolvemento cultural, económico e social do país”.
Ademais, González explicou que non é casual que o premio leve o nome de Luís Seoane, xa que é “unha homenaxe a quen entendeu o deseño como un acto de compromiso, como un vínculo entre a cultura, a industria e a cidadanía. Un creador que soñaba cun país onde a forma tamén contase, e que loitou por facelo realidade desde moitos frontes”. Por iso, estas xornadas son “unha extensión dese soño e dese compromiso”, resaltando que o sector agroalimentario é “un dos espellos máis poderosos da nosa identidade” e ao mesmo tempo “un campo fértil para o deseño: desde a etiqueta dun viño ata a forma dun queixo, desde o relato dun produto ata a súa presentación ou distribución”.
Ao longo destes dous días, os asistentes poderán coñecer de primeira man o traballo de estudos de deseño como Guillotina Estudo, Cenlitros, Desoños, Uqui Permui, Imaxe, Studio Teiga, Costa, Elga Lamas e Rebeca Ces, entre outros. Estes profesionais presentarán proxectos relacionados coa identidade gráfica de produtos tan emblemáticos como as galletas Maruxas de nata, a cervexa Estrella Galicia, os ovos do Pazo de Vilane, o Queique de Ordes, a empanada Millo verde ou o queixo Cortes de Muar.
O programa complementaráse con dúas clases maxistrais: a primeira, impartida por Àlex Gobern, presidente da Asociación de Diseñadores Gráficos e Directores de Arte de España (ADG-FAD), cunha carreira de máis de 25 anos traballando con marcas de referencia. A segunda, a cargo de Eduardo Aires, recoñecido deseñador portugués. Ademais, estarán presentes dous emprendedores do sector agroalimentario, Nuria Varela-Portas, do Pazo de Vilane, e Xosé Ramón Durán, CEO de Terra de Asorei, quen participarán en conversas moderadas por Pepe Barro para compartir as súas experiencias.
Estas xornadas poñen de manifesto a importancia de conectar o deseño coa cultura e a industria alimentaria galega, promovendo unha visión integrada que contribúa á innovación e á valorización dos produtos locais.