A Feira Matemática reúne na Coruña a 500 estudantes para achegar a ciencia á cidadanía
Preto de 500 estudantes de distintos niveis educativos participaron na XVIII Feira Matemática, organizada pola Asociación Galega do Profesorado de Educación Matemática (AGAPEMA) coa colaboración da Universidade da Coruña e o apoio do Concello da Coruña.
O evento desenvolveuse ao longo do día nas instalacións de Palexco, reunindo alumnado de infantil, primaria, secundaria, bacharelato e formación profesional de centros da Coruña, Sada, Rois, Culleredo, Oleiros, Baio e Ferrol.
Nesta edición, a feira centrouse no lema "A maxia das matemáticas", e os estudantes presentaron unha trintena de proxectos elaborados baixo a supervisión de 92 docentes. O concelleiro de Educación, Formación e Innovación Tecnolóxica, Juan Ignacio Borrego, puxo en valor “o esforzo do profesorado e do alumnado na preparación desta feira, que ano tras ano se converte nun escaparate de talento e creatividade ao servizo da educación”.
O Goberno municipal de Inés Rey destacou a importancia da divulgación científica e a innovación educativa para a construción dunha cidade máis igualitaria e preparada para os retos do futuro. A través do apoio a iniciativas como esta feira, promóvese a aprendizaxe activa e o pensamento crítico entre as xeracións máis novas.
A cita tamén contou coa participación de entidades como o Centro de Investigación e Tecnoloxía Matemática de Galicia, a Federación Provincial de ANPAS, o Instituto Galego de Estatística, Protección Civil e a Xefatura Provincial de Tráfico. Estímase que arredor de 1.500 persoas visitaron a mostra ao longo da xornada.
A Feira Matemática celébrase anualmente co gallo do Día Escolar das Matemáticas e consolidouse como un referente na divulgación científica e educativa na cidade.