A Feira das Marabillas celebra a súa 29ª edición cunha homenaxe á Coruña medieval
A alcaldesa Inés Rey inaugurou unha nova edición da tradicional Feira das Marabillas, que converterá a Cidade Vella nun escenario de ambientación medieval ata o domingo 27 de xullo. O evento conta cunha ampla programación cultural e de lecer para todos os públicos.
A Coruña volve mergullarse na súa historia cunha nova edición da Feira das Marabillas, que este ano celebra o seu 40 aniversario desde a súa recuperación no ano 1993. A alcaldesa, Inés Rey, foi a encargada de inaugurar oficialmente este mércores o evento, nun acto celebrado na praza de Azcárraga, acompañada de representantes da Asociación Comercial e Empresarial ‘Ciudad Antigua’ da Coruña (ACECA), entidade organizadora xunto ao Concello.
“Este acontecemento xa forma parte do imaxinario do verán coruñés, e serve de antesala das grandes festas de agosto, as festas de María Pita”, destacou Rey, quen tamén percorreu os principais emprazamentos da feira, repartidos entre a Cidade Vella e a praza de María Pita.
A Feira das Marabillas recupera o espírito da antiga Feira Franca do século XVI cunha oferta que inclúe música, espectáculos, animación de rúa, gastronomía e actividades infantís, todo nunha ambientación histórica que transforma o centro da cidade durante cinco días.
Unha das propostas destacadas será o encontro de música medieval, que terá lugar este xoves 24 de xullo na igrexa de Santiago ás 20.30 horas, con entrada libre ata completar aforo. Ademais, o Recuncho das Pícaras, situado en María Pita, ofrecerá actividades pensadas para o público máis novo.
O horario da feira será de 11.00 a 14.00 e de 17.00 a 00.00 horas, ampliándose ata a 1.00 da madrugada o xoves, venres e sábado, e ata as 23.00 horas o domingo.
A Feira das Marabillas forma parte do programa de actividades culturais e de lecer impulsado polo Goberno local para este verán, co obxectivo de dinamizar a cidade e fomentar a participación cidadá arredor do patrimonio histórico da Coruña.