A Facultade de Informática da UDC será o escenario da XXIX Olimpíada Informática Española
A Facultade de Informática da Universidade da Coruña (UDC) será a sede das competicións da XXIX edición da Olimpíada Informática Española (OIE), que se celebrarán entre os días 4 e 6 de abril. Este evento de programación algorítmica está dirixido a estudantes de ESO e Bacharelato de toda España.
Tras anos celebrándose en Madrid, a OIE pasou a ter un formato itinerante na pasada edición, e este ano incorpora unha novidade adicional: a ampliación da estancia dos participantes na cidade anfitrioa. En total, 41 estudantes competirán na Coruña, dos cales 36 son mozos e 4 mozas. Todos foron seleccionados a través das fases rexionais e dun clasificatorio aberto. Galicia estará representada por dous participantes.
O obxectivo fundamental da Olimpíada é fomentar o talento en informática e a resolución de problemas computacionais, preparando ás xeracións mozas para afrontar retos académicos e profesionais de alto nivel. Os participantes destacan especialmente nas áreas de matemáticas, programación e resolución de problemas algorítmicos.
O evento comezará o venres pola tarde cunha sesión de benvida e probas iniciais. O sábado celebrarase a primeira sesión do concurso, e pola tarde os participantes gozarán dunha programación de actividades sociais e turísticas. A competición retomarase o domingo, rematando antes da entrega de premios, onde ademais dos galardóns, anunciaranse as clasificacións que darán acceso á olimpíada internacional.
Este evento está coorganizado pola Universidade da Coruña e o Colexio Profesional de Enxeñaría en Informática de Galicia (CPEIG), consolidando a Galicia como un referente no eido da tecnoloxía e a educación dixital.