A Fábrica acollerá o xoves 22 a entrega do IV Premio Mundiario de Xornalismo a José Castro López
A Fábrica, en Oleiros, será o escenario da entrega do IV Premio Mundiario de Xornalismo, que recoñecerá a traxectoria do xornalista José Castro López. O acto desenvolverase o xoves 22 de xaneiro, ás 20.00 horas, e terá carácter público e aberto.
Segundo recolle o fallo do xurado, a distinción concédese pola súa ampla carreira no ámbito da comunicación e, en especial, polo seu compromiso continuado coa liberdade de expresión e coa defensa da cultura.
Na cerimonia intervirán o alcalde de Oleiros, Ángel García Seoane, e o director e fundador de Mundiario, José Luis Gómez, quen será o encargado de facer entrega ao galardoado da escultura conmemorativa do premio, unha peza creada polo artista Fran Lareo.
A organización avanzou que o evento contará coa presenza de personalidades destacadas da cultura, do xornalismo, da política e tamén do eido económico, nunha cita que pretende converterse nun punto de encontro arredor do recoñecemento á profesión xornalística.