A Fábrica acolle este sábado o concerto acústico de La Habitación Roja dentro do ciclo Voces Cálidas
O Centro Cultural A Fábrica (Perillo) será este sábado 7 de febreiro o escenario de arranque da XIII edición do ciclo Voces Cálidas para Noites de Inverno, coa actuación en formato acústico de La Habitación Roja. O concerto comezará ás 20.30 horas e forma parte da programación cultural promovida no municipio de Oleiros.
A banda, nacida en L'Eliana (Valencia) en 1995, chega a Perillo para presentar o seu décimo cuarto traballo de estudo, 'Crear', un disco que afonda no universo habitual do grupo: melodías de fondo melancólico, letras emocionais e ese ton romántico que foi definindo a súa identidade ao longo de tres décadas.
O álbum incorpora tamén unha lectura vital sobre a experiencia e a madurez, cunha portada que homenaxea ás nais dos catro compoñentes. Entre os temas máis destacados está 'Crear sempre é mellor que destruír', unha peza nacida da reflexión sobre o impacto da depresión nunha persoa próxima e construída como mensaxe de apoio e esperanza, reivindicando a creación como ferramenta para atravesar momentos difíciles.
As entradas poden mercarse con antelación a través da plataforma online, o propio día do espectáculo, no despacho de billetes dos auditorios municipais desde unha hora antes do inicio, a un prezo de 6,00 euros, ata completar a capacidade da sala.