A exposición ‘Menssana’ busca promover a saúde mental entre a mocidade e erradicar mitos
A exposición temporal itinerante ‘Menssana’, que se presenta no Museo Domus da Coruña, ten como obxectivo promover a saúde mental entre a poboación xuvenil e loitar contra os mitos e prexuízos que xerán un estigma social cara ás persoas que buscan axuda profesional.
Durante o acto de presentación, a concelleira de Benestar Social, Nereida Canosa, destacou a importancia dos espazos municipais e dos Museos Científicos para sensibilizar á cidadanía. “Desde o Goberno de Inés Rey somos conscientes do potencial que teñen os museos para educar e xerar conciencia na poboación, como estamos facendo con esta exposición”, sinalou Canosa.
A concelleira tamén subliñou os retos que afronta a saúde mental na sociedade actual, facendo fincapé no estigma social e a discriminación derivados do descoñecemento. "Existen moitos aspectos que aínda se descoñecen sobre a bioloxía e a psicología dos trastornos mentais, e só a través da investigación experimental poderemos abordalos de maneira efectiva", comentou.
A exposición ‘Menssana’, que poderá visitarse na Domus, ten como propósito visibilizar e normalizar os trastornos mentais, favorecendo unha maior comprensión científica e social sobre esta temática. A mostra consta de seis módulos cúbicos que abordan unha ducia de áreas temáticas clave, como a bioloxía do cerebro, os trastornos mentais no cine, a plasticidade neuronal, as drogas e os efectos no cerebro, a ansiedade, a depresión, o suicidio, a esquizofrenia, o trastorno obsesivo compulsivo e os trastornos de conduta alimentaria.
Cada módulo presenta paneis cun deseño gráfico impactante, acompañados de información, infografías, ilustracións e outros recursos que axudan a afondar na complexidade dos trastornos mentais e na importancia de manter un benestar cognitivo e emocional.
“Esta exposición tamén ten un espazo interactivo onde o público poderá expresar como se sente a través dun post-it, ao tempo que reflexiona sobre a importancia de coidar a súa saúde mental”, explicou Canosa.