A Escola de Música Sementeira de Cambre celebra unha audición na honra de Santa Icía
A Escola de Música Sementeira de Cambre, con sede en Sigrás, conmemora este ano a festividade de Santa Icía cunha audición especial protagonizada polo seu alumnado. A cita terá lugar o venres 21 de novembro de 2025, ás 17.30 horas, no salón de actos da propia escola, que se encherá de música e talento das novas xeracións.
Segundo explican desde a entidade, a audición servirá para que o estudantado das distintas especialidades instrumentais poida mostrar o traballo realizado ao longo do curso diante das súas familias e da veciñanza. O programa combinará pezas de diferentes estilos e niveis, o que permitirá amosar a diversidade formativa da Escola de Música Sementeira, activa en Cambre desde finais da década de 1970.
A celebración enmárcase nos actos en honra de Santa Icía, patroa da música, motivo polo que a organización anima ao público a sumarse a esta xornada festiva. A actividade conta co apoio do Concello de Cambre, da Deputación da Coruña e da Xunta de Galicia, e a entrada será libre até completar aforo, co obxectivo de achegar a música á cidadanía e reforzar o vínculo da escola co municipio.