A DXT intensifica os controis de velocidade na provincia nunha nova campaña de seguridade viaria
A subdelegada do Goberno na Coruña, María Rivas, lanzou este un chamamento á responsabilidade nas estradas coincidindo co inicio dunha nova campaña especial de control da velocidade impulsada pola Dirección Xeral de Tráfico (DXT), que se desenvolverá ata o domingo 10 de agosto na provincia e no conxunto do Estado.
Rivas participou nun control da Garda Civil de Tráfico xunto ao comandante de Tráfico, José Ángel Corral Segade, e a xefa provincial de Tráfico da Coruña e coordinadora da DXT en Galicia, Victoria Gómez Dobarro. Desde alí, alertou da importancia de moderar a velocidade e insistiu en que “a velocidade excesiva segue a ser unha das principais causas de sinistralidade, e é totalmente evitable”.
Segundo os datos da campaña realizada o pasado ano, entre o 15 e o 21 de xullo, controláronse en Galicia 127.445 vehículos, dos que 6.586 foron denunciados. Na provincia da Coruña realizáronse controis sobre 54.404 vehículos, con 1.742 denuncias formuladas. “Son cifras que amosan que, a pesar dos esforzos e da vixilancia, aínda queda moito por facer. Por iso, queremos facer un chamamento firme á prudencia”, subliñou Rivas.
A subdelegada tamén apelou á reflexión con datos contundentes: “A partir de 80 km/h é practicamente imposible que unha persoa sobreviva a un atropelo, mentres que a 30 km/h o risco de morte redúcese ao 5 %”.
Durante esta campaña intensificaranse os controis en toda a provincia, contando cun operativo de 150 axentes e con todos os medios humanos e materiais dispoñibles. Rivas aproveitou para recoñecer e agradecer o traballo do persoal técnico e da Garda Civil de Tráfico, remarcando o compromiso do Goberno coa loita contra a sinistralidade viaria.
Nun contexto no que arredor do 60 % dos condutores en España admite circular por riba do límite en estradas convencionais, preto do 50 % en zonas urbanas e máis do 60 % en autovías e autoestradas, a subdelegada reafirmou que o obxectivo segue sendo reducir ao máximo o número de accidentes relacionados coa velocidade.