A Domus abre MiniDomus, unha nova sala interactiva para que a cativada aprenda xogando
A Domus, o museo dedicado ao ser humano integrado nos Museos Científicos Coruñeses, vén de estrear MiniDomus, unha nova sala de experiencias interactivas pensada especificamente para o público infantil. A proposta busca ofrecer unha visita adaptada aos primeiros anos de nenas e nenos, baseada en aprender facendo e na curiosidade como motor para descubrir a ciencia e a tecnoloxía.
A alcaldesa da Coruña, Inés Rey, visitou este luns o novo espazo acompañada polo director de Cultura, Uxío Novo, e polo director dos Museos Científicos Coruñeses, Marcos Pérez. Durante o percorrido, Rey sinalou que coa apertura de MiniDomus o Goberno municipal reafirma o seu compromiso coa divulgación científica e tecnolóxica, poñendo o foco en que os máis pequenos sintan interese por estes ámbitos.
MiniDomus está estruturada en sete áreas nas que o xogo actúa como ferramenta de aprendizaxe. Entre as actividades, a cativada pode explorar a presión do aire lanzando pelotas por distintos percorridos, experimentar coa luz e as cores para crear composicións luminosas, construír con engrenaxes, poleas e manivelas, ou poñer a proba o equilibrio e a gravidade levantando estruturas sobre superficies con diferentes ángulos. Tamén se propoñen retos para crear máquinas móbiles con rodas, eixos, cordas e circuítos en zigzag, dar forma a ideas con pezas de construción e parafusos de bolboreta, e imaxinar mundos completos con grandes bloques, desde dinosauros ata naves espaciais.
O novo ámbito está concibido para visitas en familia e con acompañamento educativo, cun deseño que favorece a permanencia e a interacción durante máis tempo. MiniDomus servirá ademais como base para outras actividades complementarias, como talleres temáticos e espectáculos no salón de actos, coa idea de abrir un espazo específico para un público que non adoita participar en propostas de ciencia e tecnoloxía.
O proxecto foi deseñado polo equipo técnico dos Museos Científicos Coruñeses e conta coa colaboración da Fundación Española para la Ciencia y la Tecnología e do Ministerio de Ciencia, Innovación y Universidades.