A Deputación resolve as axudas do programa DP0030 para reforzar o tecido turístico da provincia
A Deputación da Coruña aprobou a resolución definitiva das axudas do programa DP0030, dirixidas a entidades sen ánimo de lucro que traballan na promoción turística da provincia. Esta convocatoria destina un total de 2.062.060,60 euros para apoiar 18 proxectos que fomentan a dinamización e vertebración do territorio a través do turismo.
As organizacións beneficiarias inclúen desde asociacións de concellos e grupos de desenvolvemento rural ata fundacións e mancomunidades, todas con iniciativas que buscan promover destinos, produtos turísticos e eventos estratéxicos para o territorio coruñés.
O vicepresidente provincial e responsable de Turismo, Xosé Regueira, destacou “a obriga de facilitar o traballo e a cooperación entre todos os axentes do sector para a promoción turística da provincia dende un punto de vista sostible pero tamén cohesionado e que prima a calidade”. Engadiu que “estas axudas teñen gran importancia pola diversidade da nosa oferta turística nun territorio que alberga oito xeodestinos moi diferentes, pero con liñas estratéxicas conxuntas que son o resultado dese traballo colaborativo”.
Entre os proxectos que recibirán financiamento atópase a Asociación para a Xestión do Xeoparque do Cabo Ortegal, con 152.500 euros para continuar co desenvolvemento turístico deste espazo recoñecido pola UNESCO. A Asociación de Concellos do Camiño Inglés contará con 187.500 euros para impulsar esta ruta xacobea, mentres que a Asociación de Concellos do Camiño de Fisterra e Muxía recibirá 124.842 euros.
A Asociación de Concellos da Vía Verde Compostela‑Tambre‑Lengüelle, que promove o aproveitamento turístico das antigas vías ferroviarias, obterá 168.000 euros. Ademais, a Asociación OPC Galicia recibirá 176.250 euros e a Asociación de Desenvolvemento Rural Mariñas‑Betanzos contará con 187.500 euros para proxectos relacionados co turismo sostible.
Outras entidades beneficiadas son a Asociación de Empresarios e Promoción Turística de Camariñas (69.940 euros) e a Asociación Rural de Desenvolvemento da Ría de Muros‑Noia (90.000 euros). Tamén a Asociación Socio‑Cultural Auga e Sal, que promove actividades culturais vinculadas ao turismo, recibirá 38.000 euros.
Entre organismos supramunicipais e fundacións do sector, o Consorcio de Turismo e Congresos da Coruña obtén 187.500 euros, a Costa da Morte Asociación Turística (CMAT) 119.400 euros, a Fundación A Coruña Convention & Visitors Bureau disporá de 183.750 euros, e a Fundación do Instituto Feiral da Coruña será beneficiaria de 187.455,94 euros.
A empresa pública Información e Comunicación Local, S.A. (INCOLSA) tamén recibe 187.500 euros, mentres que a Mancomunidade de Concellos da Comarca de Ferrol contará con 181.250 euros. A Mancomunidade de Municipios da Comarca de Ordes disporá de 68.750 euros, e a Mancomunidade Ría de Arousa‑Zona Norte recibirá 143.750 euros. Finalmente, a Sociedade Mixta de Turismo de Ferrol percibirá 125.000 euros.
Este programa de subvencións reflicte o compromiso da Deputación da Coruña co apoio ao tecido asociativo turístico, permitindo reforzar a creación dunha oferta turística estruturada, sostible e de calidade que contribúe ao desenvolvemento socioeconómico dos concellos e comarcas da provincia.