A Deputación reparte máis de 146.000 euros para impulsar o audiovisual en galego en 2025
A Deputación da Coruña vén de aprobar de forma definitiva as axudas do programa FO301/2025, unha convocatoria orientada a apoiar empresas sen ánimo de lucro que se dedican á produción e distribución audiovisual. O obxectivo é claro: potenciar a exhibición, comercialización e distribución de obras en lingua galega na provincia ao longo do ano 2025.
En total, concedéronse 13 subvencións que suman 146.368,91 euros. Con esta iniciativa, a Deputación reafirma o seu compromiso co impulso da cultura propia, a defensa do idioma galego e o apoio ao talento creativo e empresarial dun sector estratéxico como é o audiovisual.
Entre os proxectos beneficiarios atópanse propostas tan variadas como “Estrea en VOS en galego”, de Animala Estudio Audiovisual; “SIRAT / Oliver Laxe”, de BTeam Pictures; ou a longametraxe “Tralovento”, presentada por Zeitun Films. Tamén foron seleccionadas producións como “Adeus, Berta” (Filmika Galaika), “As Estacións” (7 Camiños Films), “As Liñas Descontinuas” (Illa Bufarda), “A Foreign Song” (Miramemira), “As Neves” (Gaitafilmes), “Tralo Invisible” (Film Tanks), “Almas do Tempo” (Rebordelos), “Raia” (Aio Producións) e “Cando toco un animal” (Abano Producións).
A través destas axudas, a institución provincial procura reforzar o tecido cultural da provincia e consolidar unha industria audiovisual máis diversa, comprometida coa identidade galega e coa normalización do idioma como ferramenta central das creacións contemporáneas. A convocatoria tamén subliña a aposta da Deputación por un panorama cultural plural, innovador e enraizado no territorio.