A Deputación reforza o deporte de base con axudas para contratar persoal técnico en 66 concellos
A Deputación da Coruña aprobou a concesión definitiva das subvencións destinadas a financiar os gastos de contratación de persoal técnico nos servizos municipais de deportes, cun orzamento total de 789.320 euros. A través desta liña de apoio, 66 concellos da provincia poderán incorporar ou manter técnicos deportivos, contribuíndo tamén á estabilidade do emprego vinculado ás áreas municipais de deporte.
O deputado de Deportes, Antonio Leira, puxo o foco no papel clave deste persoal: 'O persoal técnico é o motor do deporte nos concellos'. Segundo explicou, estes profesionais permiten manter abertas as instalacións, organizar escolas deportivas e garantir actividades para todas as idades, algo que considera especialmente importante nos municipios con menos recursos. Leira subliñou tamén que as achegas melloran a calidade e a seguridade das programacións ao estar dirixidas por persoal cualificado e lembrou que a Deputación pode financiar ata o 80 por cento do custo destes postos, o que supón un alivio para as administracións locais.
Algúns dos concellos beneficiados son:
- Abegondo: 15.000 euros
- Aranga: 15.000 euros
- Arteixo: 15.000 euros
- Betanzos: 15.000 euros
- Carral: 10.000 euros
- Coirós: 15.000 euros
- Irixoa: 10.000 euros
- Miño: 15.000 euros
- Oleiros: 10.000 euros
- Vilasantar: 10.000 euros
A Deputación enmarca estas axudas na idea do deporte como ferramenta de saúde, convivencia e dinamización social, co obxectivo de que a práctica deportiva chegue de maneira regular e organizada ao conxunto do territorio.