A Deputación reclama un plan urxente para parar a perda de persoal e investimentos no CIAM de Mabegondo
O pleno da Deputación da Coruña aprobou unha moción conxunta de PSOE, BNG e Alternativa dos Veciños para esixir á Xunta de Galicia un plan inmediato que permita ‘frear o desmantelamento’ do Centro de Investigacións Agrarias de Mabegondo (CIAM), situado no municipio de Abegondo. A proposta saíu adiante co voto en contra do PP.
Os grupos promotores denuncian unha deterioración sostida do centro, tanto pola perda de persoal como polo envellecemento das instalacións e do equipamento, e reclaman que a administración autonómica dote ao CIAM dos medios necesarios para garantir a súa continuidade e recuperar o seu papel como referencia da investigación agraria.
Durante o debate, o voceiro socialista Bernardo Fernández cualificou a situación de ‘abandono’ e pediulle á Xunta que active investimentos e recursos para reverter unha deriva que, ao seu xuízo, simboliza tamén a falta de aposta polo rural. Na mesma liña, o portavoz de AV, Ángel García Seoane, advertiu do declive dun complexo que chegou a ser ‘exemplar’ e que leva anos, segundo dixo, sen a atención necesaria. A portavoz do BNG, Avia Veira, insistiu en reforzar a investigación pública no eido agrario e rexeitou recortes e precarización.
O acordo plenario inclúe demandas concretas, como habilitar unha partida orzamentaria para renovar maquinaria agrícola e instalacións agrogandeiras obsoletas, así como rematar as obras e dotar de equipamento o banco de xermoplasma, unha infraestrutura ligada á conservación de recursos xenéticos agrarios. Tamén se solicita a renovación da xerencia para avanzar cara a unha xestión máis transparente e participativa.
A moción pon o acento na ‘precariedade laboral’ e lembra que no pasado mes de novembro seis investigadores deixaron o CIAM tras un concurso de traslados, o que, segundo o texto, agravou unha falta de cobertura de prazas que vén de atrás. O documento tamén alerta de problemas de seguridade laboral e cita un accidente recente cunha máquina en mal estado que derivou no precintado de parte do equipamento por non cumprir a normativa.
Pola súa banda, o PP defendeu que os principais avances no sector veñen da iniciativa privada e puxo en dúbida a utilidade práctica do centro para explotacións, en especial no ámbito lácteo, ao tempo que avogou por ‘redefinir’ o papel do CIAM.