A Deputación presenta á Xunta o seu novo modelo de residencias públicas
O presidente da Deputación da Coruña, Valentín González Formoso, mantivo unha reunión coa conselleira de Política Social e Igualdade da Xunta de Galicia, Fabiola García, para presentarlles o novo modelo de residencias públicas para maiores que a institución provincial impulsa nos concellos de As Pontes, Rianxo e Ordes. Trátase dun modelo innovador que aposta por centros de menor capacidade, cunha atención máis personalizada, o uso de novas tecnoloxías e a convivencia interxeneracional.
Na reunión, Formoso e a deputada provincial responsable de Política Social, Mar García Vidal, explicaron á conselleira os detalles desta iniciativa pioneira, “que busca evitar o desarraigo e a soidade das persoas maiores, ofrecéndolles un entorno residencial máis amable e acolledor, semellante ao fogar”, explicou o presidente. Ademais, subliñou que este modelo aposta por unha atención centrada na persoa, incorporando tecnoloxías como a domótica, a telemedicina e sistemas de rehabilitación cognitiva e física.
Formoso destacou que se trata de crear unha rede provincial de residencias adaptadas ás necesidades reais das persoas maiores, cun enfoque en dous piares fundamentais: a innovación e unha atención máis próxima e humana. O presidente tamén agradeceu a “colaboración total” da Xunta de Galicia, tanto para facilitar a tramitación administrativa do proxecto como para o mantemento dos centros. A Xunta está disposta a contar con prazas concertadas nas residencias que impulse a Deputación da Coruña, o que, segundo Formoso, é unha excelente noticia para seguir avanzando no proxecto.
Pola súa parte, a conselleira de Política Social, Fabiola García, tamén manifestou o seu agradecemento á Deputación e destacou a súa disposición para crear recursos de atención á dependencia, un ámbito de responsabilidade de todas as administracións.
O primeiro dos centros abrirase en As Pontes, onde se testará este novo concepto de residencia pública. A instalación contará con espazos e actividades abertos á comunidade para fomentar a convivencia entre xeracións. O proxecto tamén incluirá a colaboración con entidades locais, centros educativos e familias para evitar o illamento das persoas maiores.