A Deputación presenta a nova edición de #HoxeEscriboEn, un concurso de relatos para promover o talento literario e o turismo local
A Deputación da Coruña, a través da Biblioteca Provincial e a área de Turismo, lanza a edición 2024 do concurso de relatos #HoxeEscriboEn. Esta iniciativa busca promover o talento creativo literario, resaltar o patrimonio dos concellos da provincia e fomentar o turismo de proximidade.
O concurso está aberto a persoas maiores de idade que desexen presentar microrrelatos ambientados en algún dos 93 municipios da provincia da Coruña. Os mellores relatos recibirán premios en forma de estancias rurais.
Os relatos deben ser inéditos e non ter sido presentados en ningún outro concurso. A extensión máxima permitida é de 500 palabras, e deben ser escritos a dobre espazo, en letra Times New Roman tamaño 12, en formato DIN-A4 e nunha soa cara. A temática debe estar relacionada con aspectos destacables do patrimonio local, como historia, lendas, tradicións, persoeiros ou valores culturais e medioambientais dos municipios da provincia.
O prazo para enviar os relatos remata o sábado 31 de agosto. As propostas poden presentarse a través do formulario habilitado na web da Biblioteca da Deputación da Coruña. Cada participante poderá enviar varios relatos, cumprimentando un formulario por cada un. Para calquera dúbida, pódese contactar co correo biblioteca.info@dacoruna.gal ou co teléfono 981080176.
Os premios inclúen unha estancia para dúas persoas dunha noite con almorzo e cea en cabanas rurais, outra estancia de noite con almorzo incluído e unha comida ou cea para dúas persoas en establecementos da provincia. Ademais, sortearanse lotes de produtos da provincia entre todos os participantes.
Os gañadores serán notificados por teléfono ou correo electrónico e tamén se publicarán nas redes sociais e na web da biblioteca durante o mes de setembro.
