A Deputación participará no Festival da Luz de Boimorto cun espazo propio
A Deputación da Coruña estará presente no Festival da Luz de Boimorto co seu propio espazo, o ‘Mercado Deputación da Coruña’, que se desenvolverá os días 24 e 25 de agosto. Este mercado ofrecerá unha ampla variedade de produtos locais de gastronomía e artesanía, así como unha zona para showcookings e un escenario con diversas actividades culturais e lúdicas para todos os públicos.
Durante o sábado 24, de 11.30 a 00.30 horas, e o domingo 25, de 11.30 a 21.30 horas, os visitantes poderán explorar o ‘Mercado Deputación da Coruña’, que contará coa participación de preto dunha trintena de produtores e artesáns locais. Entre os expositores agroalimentarios figuran nomes como A Conserveira, Bonilla a la Vista, Casa da Avoa e Cafés Lúa, entre outros. Pola súa banda, os artesáns incluirán Rocigarcía, Jorge Eiroa García, O Carabel Ecocestos e Susana Anta, entre moitos outros.
Un dos atractivos do mercado será a zona de showcookings, dirixida polo chef André Arzúa de Espazo Abella, de Santiago de Compostela. Arzúa ofrecerá dous pases cada día: ás 13.00 e ás 17.00 horas o sábado, e ás 13.00 e ás 15.00 horas o domingo. Os pratos que preparará inclúen ceviche de rodaballo e allo branco con virutas de picaña curada o sábado, e ceviche de linguado e tartar de tomates darredor con aromáticas e caviar cítrico o domingo.
O espazo da Deputación tamén contará cun escenario propio que acollerá unha variada programación de actividades. O sábado, o programa inclúe un concerto punkinfantil de Peter Punk e Brais das Hortas, un monólogo de Víctor Grande, e actuacións de Gin TONI’s, Ruxe Ruxe e DJ Nyan Boy. O domingo, as actividades seguirán cun concerto da banda infantil Suzikiños “Let’s Folk” e a representación de ‘Muiñada’ por Teatro Urdidme, así como os concertos de Capital Voscov, Caamaño&Ameixeiras e Ortiga.
Con esta participación, a Deputación da Coruña exhibe o traballo de produtores e artesáns da provincia, enmarcando a súa campaña turística e gastronómica “A provincia que sabe”, e colabora co Festival da Luz para promover actividades culturais que enriquecen o evento.