A Deputación impulsa unha senda peonil e ciclista entre Piadela e Viladesuso cun investimento de 470.000 euros
O pleno da Deputación da Coruña aprobou este venres o proxecto técnico para construír unha nova senda peonil e ciclista entre Piadela e Viladesuso, no concello de Betanzos. A actuación, dotada cun investimento de 471.138,40 euros, permitirá completar a continuidade dun itinerario seguro ao longo da estrada provincial DP-0810, unha vía que soporta unha intensidade media diaria próxima aos 2.300 vehículos.
O plan prevé a execución dunha senda de 1,5 quilómetros situada na marxe esquerda da estrada, cun ancho de 2,05 metros e realizada en formigón coloreado ocre ou terrazo sobre unha base de zahorra. O obxectivo é garantir unha integración paisaxística co entorno e ofrecer un percorrido cómodo e seguro para peóns e ciclistas. Entre a calzada e a senda instalaranse un bordo e unha rigola de formigón que canalizarán as augas pluviais cara aos sumidoiros e pozos de rexistro contemplados no novo sistema de drenaxe.
A intervención inclúe tamén a construción dunha cuneta de seguridade entre os puntos quilométricos 1+080 e 1+250, mellorando a protección nunha zona de carácter máis urbano. Ademais, acometerase a colocación das canalizacións necesarias para completar o sistema de iluminación pública nun tramo duns 600 metros que actualmente carece de alumado. Unha vez rematadas estas obras, será o Concello de Betanzos quen instale o cableado, os báculos e as luminarias.
A actuación contempla igualmente a instalación de varandas nos tramos nos que o desnivel supera os 1,8 metros, co obxectivo de reforzar a seguridade dos usuarios. Xunto a isto, realizaranse traballos previos de limpeza, retirada e posterior recolocación de sinalización, pequenas demolicións en accesos e vías secundarias, así como a relocalización dun poste de telecomunicacións e dunha marquesiña.
O prazo estimado para executar as obras é de catro meses desde o seu inicio. A Deputación salienta que este proxecto supón un avance clave na mellora da mobilidade sustentable en Betanzos, ao conectar de maneira segura dous núcleos de poboación e completar a continuidade da senda ao longo dunha estrada moi transitada e esencial para a contorna rural.