A Deputación impulsa obradoiros sobre intelixencia artificial para estudantes de Secundaria
A Deputación da Coruña organiza 16 obradoiros en centros educativos da provincia dirixidos a estudantes de Educación Secundaria. As actividades abordan temas como a intelixencia artificial (IA), animación, efectos visuais, videoxogos e novos medios co obxectivo de espertar o interese da mocidade polas saídas profesionais destes sectores e fomentar os estudos vinculados coas novas tecnoloxías, a programación e o deseño, cunha elevada demanda laboral. Ademais, preténdese reducir a fenda dixital de xénero, promovendo a participación das rapazas nun eido tradicionalmente masculinizado.
A deputada de Emprego, Rosa Ana García, clausurou un dos obradoiros no colexio das Esclavas, na Coruña, onde conversou co alumnado sobre a experiencia formativa e as perspectivas que ofrece este sector para o seu futuro profesional. Outros centros que participan na iniciativa son o IES Rego de Trabes (Culleredo), o CPR Jesús Maestro (Ferrol), o IES Saturnino Montojo (Ferrol), o CPR Santiago Apóstol (Narón) e o Seminario Diocesano (Santiago de Compostela), estando previstas novas edicións noutros colexios da provincia.
Os contidos dos talleres son visuais e atractivos, baseados en exemplos reais e material didáctico que explican as técnicas empregadas, a formación necesaria e as saídas profesionais dispoñibles. O programa estrutúrase en varios módulos temáticos.
No módulo de animación explícanse as distintas fases do proceso de produción, acompañadas de exemplos prácticos. O módulo de efectos visuais amosa proxectos desenvoltos en ámbitos como o cine, a publicidade e os metaversos, destacando o uso de tecnoloxías de vangarda.
En canto aos videoxogos, analízase a súa evolución tecnolóxica, os sistemas interactivos en tempo real e as súas aplicacións en sectores como a educación ou a cultura. A realidade virtual e aumentada ocupa outro dos apartados, onde se exploran as súas posibilidades para crear experiencias innovadoras en ámbitos profesionais diversos como o turismo, a cultura ou a publicidade.
No módulo de produción virtual, introdúcense as novas formas de rodaxe en contornas virtuais 3D e preséntanse os perfís profesionais emerxentes máis demandados neste eido. Finalmente, a intelixencia artificial, un dos contidos estrela dos obradoiros, abórdase de xeito práctico e visual, centrado na IA Xenerativa.
Os participantes descobren as aplicacións desta tecnoloxía en áreas próximas á mocidade como os deportes, a moda, a música ou o cine, facendo fincapé no uso ético e responsable, así como nos desafíos que supón para a sociedade e a industria creativa.
Destaca a participación de profesionais recoñecidos como Alba Meijide, referente no sector da IA con menos de 25 anos, que asesora a grandes empresas sobre as oportunidades das novas ferramentas tecnolóxicas. Con esta iniciativa, a Deputación da Coruña busca achegar a realidade do sector audiovisual e tecnolóxico aos estudantes, axudándoos a descubrir vocacións e a preparar o seu camiño cara a empregos de futuro nun mercado laboral en constante evolución.