A Deputación estende ata o 3 de decembro o programa MercaNaVila ante a acollida masiva da cidadanía
A Deputación da Coruña ampliou ata o 3 de decembro o prazo para utilizar os bonos do programa MercaNaVila, unha medida adoptada debido á elevada demanda rexistrada desde o seu lanzamento o pasado 20 de outubro. A institución provincial atendeu así as peticións formuladas por varios concellos da provincia e pola Federación Galega de Comercio, que recolleu a opinión das asociacións locais.
O presidente provincial, Valentín González Formoso, destacou que a resposta da cidadanía superou amplamente as expectativas. Ata o momento descargáronse arredor de 80.000 bonos, leváronse a cabo máis de 156.000 operacións e o volume total de vendas xa sobrepasa os 9,6 millóns de euros. En MercaNaVila participan 1.188 establecementos situados en vilas e municipios de menos de 20.000 habitantes.
O programa conta cun orzamento de 6 millóns de euros e busca impulsar o consumo no comercio de proximidade, especialmente nos concellos máis pequenos da provincia. Máis de 2 millóns de euros en descontos foron aplicados ata a data, xerando un impacto directo na actividade económica local e contribuíndo ao mantemento do emprego.
A iniciativa está a ter unha repercusión especialmente notoria no rural, onde o comercio de proximidade se ve reforzado pola chegada de clientela que noutros momentos optaría por realizar as súas compras nas grandes cidades. Ademais, segundo destaca a Deputación, tamén está a producirse o efecto inverso: persoas residentes nas urbes achéganse ás vilas para aproveitar as vantaxes dos bonos, o que dinamiza as rúas e fortalece o tecido comercial.
A extensión do prazo permitirá que os consumidores poidan combinar os descontos de MercaNaVila coas promocións do Black Friday e adiantar compras de Nadal, incrementando así o impacto económico sobre o pequeno comercio.
A Deputación agradeceu a colaboración dos concellos e das asociacións de comerciantes na difusión dun programa que está a chegar a todas as comarcas, incluídas aquelas con menor densidade de poboación. MercaNaVila forma parte dunha estratexia máis ampla orientada a fortalecer o comercio de proximidade e fomentar a dinamización socioeconómica do rural coruñés.
A través da plataforma web oficial (mercanavila.gal), os usuarios poden descargar os seus bonos de ata 100 euros en descontos, así como consultar os establecementos adheridos, que inclúen desde tendas de moda, librarías e ferreterías ata ópticas, electrodomésticos, perruquerías ou xoierías.