Deputación

O investimento medra máis dun 26% e a rede suma 12 centros activos con 134 proxectos emprendedores en marcha, segundo destacou o Goberno provincial

A Deputación da Coruña aprobou a concesión definitiva das axudas do programa PEL-Rede Coworking 2026, dirixidas a apoiar a xestión, o funcionamento e a dinamización dos espazos integrados na Rede Provincial de Coworking. A resolución fíxose pública no Boletín Oficial da Provincia (BOP) deste mércores, 28 de xaneiro.

O programa suma un orzamento total de 213.534,29 euros e chega a 8 concellos e a 3 entidades sen ánimo de lucro titulares dos centros repartidos pola provincia. As subvencións concedidas van dos 10.570,29 aos 27.000 euros por entidade e cobren ata o 50% dos orzamentos presentados.

O presidente provincial, Valentín González Formoso, subliñou que estes espazos se consolidaron como polos de innovación e oportunidade, especialmente no rural, ao ofrecer recursos e acompañamento ás persoas emprendedoras para converter ideas en iniciativas viables. O apoio económico permitirá afrontar custos de funcionamento, persoal técnico especializado e accións de dinamización (formación, asesoramento ao emprendemento e organización de eventos), reforzando o papel destes centros como motores de actividade económica e cohesión territorial.

A convocatoria de 2026 supón un salto respecto ao exercicio anterior: pasa de 169.171,08 euros en 2025 a 213.534,29 euros agora, un incremento de máis do 26%. Para Formoso, esta subida de fondos ‘amosa con feitos’ a aposta por un modelo de desenvolvemento apoiado no emprendemento local, clave para xerar emprego e axudar a fixar poboación.

A Rede Provincial de Coworking botou a andar en 2019 coa apertura do primeiro espazo no Pazo de Arenaza (Oleiros) e, desde entón, foi medrando ata chegar aos 12 centros activos. Segundo os datos facilitados, máis de 600 persoas emprendedoras e pequenos produtores xa empregaron as instalacións para poñer en marcha proxectos empresariais ou transformar produtos do sector primario, e actualmente a rede dá soporte a 134 iniciativas.

Na actualidade, a Rede intégrana nove espazos de coworking (Pazo de Arenaza en Oleiros, LAB Barbanza con viveiro de empresas en Boiro, Espazo A Proa en Ames, coworking da Capela, Centro de Emprendemento A Estación en Vedra, Green Coworking nas Pontes, Coworking A Pobra, coworking Dixital CCompostela en Santiago e a Casa do Pescador en Miño) e tres centros de transformación agroalimentaria (Transformando en Brión, A Fusquenlla en Moeche e o Centro de Transformación de Alimentos de Baroña en Porto do Son), especializados na transformación de produtos agrícolas, cárnicos, moluscos e peixe.