A Deputación e a UDC colaboran para facilitar o comedor aos estudantes da Residencia Elvira Bao
A Deputación da Coruña e a Universidade da Coruña veñen de renovar o convenio de colaboración que permitirá, por un curso máis, que o alumnado aloxado na Residencia Universitaria Elvira Bao poida utilizar o comedor do IES Rosalía Mera. Esta iniciativa, que funciona desde 2019, consolídase como un exemplo de cooperación entre institucións públicas para mellorar as condicións de vida dos estudantes universitarios na cidade.
O acordo establece a prestación do servizo con 70 prazas dispoñibles, que inclúen almorzos, xantares e ceas segundo o calendario escolar do centro. A Deputación comprométese a facilitar as instalacións e organizar o servizo, mentres que a UDC será responsable de comunicar regularmente a relación de estudantes autorizados e as súas necesidades alimentarias específicas.
O convenio, asinado por Xosé Penas, deputado provincial de patrimonio e contratación, e o reitor da UDC, Ricardo Cao, contempla prezos bonificados para estudantes pertencentes a familias numerosas, tanto de categoría xeral como especial. Tamén regula a xestión das compensacións económicas derivadas da prestación do servizo.
A vixencia do acordo abranguerá dende o 1 de setembro de 2025 ata o 31 de decembro de 2026, con posibilidade de prórroga por un ano máis, o que garante a continuidade do apoio institucional ao benestar universitario.
Ambas entidades subliñan que esta colaboración reafirma o seu compromiso co acceso equitativo á educación e a mellora da calidade de vida do estudantado, poñendo tamén en valor o uso eficiente dos recursos públicos mediante a coordinación interinstitucional.